ჰოსპიტალითი და ველნეს ინდუსტრია არ არის მხოლოდ სერვისი — ეს არის დამოკიდებულება, კულტურა და ადამიანების გაბედნიერების ხელოვნება. სწორედ ამ ფილოსოფიით ხელმძღვანელობს გიორგი სამარგულიანი, Axis Towers Wellness & Falestra-ს შემქმნელი და დირექტორი, რომლის პროფესიული გზა და ხედვა მრავალი ახალგაზრდა მენეჯერისთვის ინსპირაციის წყაროა.
კითხვა 1: რას ნიშნავს თქვენთვის სტუმარმასპინძლობის სფერო?
გიორგი სამარგულიანი:
სტუმარმასპინძლობა, ჩემი აზრით, ყველა ქართველს სისხლში გვაქვს. ჩვენ ხომ ვამბობთ — „სტუმარი ღვთისაა“. ეს ფრაზა უბრალოდ სიტყვები არ არის, ეს საუკუნეების განმავლობაში ჩამოყალიბებული ღირებულებაა. ოდითგანვე ქართველი მასპინძელი, თუნდაც თავად გაჭირვებაში ყოფილიყო, სტუმრისთვის ბოლო ლუკმას გაიმეტებდა და გულით უმასპინძლდებოდა.
სტუმრის სიყვარული ნიშნავს გულწრფელ ზრუნვას, ყურადღებას და იმ ემოციის გაზიარებას, რომელსაც თავად იღებ მასპინძლობის პროცესში. ჩემთვის ჰოსპიტალითი არის სიხარულის მიღება სხვისი ბედნიერებით — როცა სტუმარი კმაყოფილი მიდის, შენც ბედნიერი რჩები. ეს არის ემოციური კავშირი, რომელიც ნამდვილ ხარისხს ქმნის.
კითხვა 2: საიდან დაიწყო თქვენი კარიერა hospitality სფეროში?
გიორგი სამარგულიანი:
ჩემი პირველი სამსახური იყო Sheraton Metechi Palace-ში — პირველ ხუთვარსკვლავიან სასტუმროში თბილისში. მუშაობა დავიწყე ფიტნესის რეცეფციაში, მაშინ მხოლოდ 17 წლის ვიყავი. დღემდე ძალიან კარგად მახსოვს შერატონის შთამბეჭდავი ჰოლი, ის ემოცია, რაც პირველ სამუშაო დღეს მქონდა და ჩემი პირველი ხელმძღვანელი — ნუნუ მიქელაძე.
მას დღემდე დიდ პატივს ვცემ, ვაფასებ და ძალიან მიყვარს. სწორედ იქ ვისწავლე დისციპლინა, სტუმართან ურთიერთობა და პროფესიული პასუხისმგებლობა. ეს იყო საფუძველი, რომელმაც მთელი ჩემი შემდგომი გზა განსაზღვრა ჰოსპიტალითი სფეროში.
კითხვა 3: მიაღწიეთ თუ არა მაქსიმუმს ამ სფეროში?
გიორგი სამარგულიანი:
მე ვფიქრობ, რომ ჰოსპიტალითი სფეროში მაქსიმუმი არ არსებობს. ეს უსაზღვრო შესაძლებლობების სფეროა, სადაც ყოველთვის შეგიძლია უკეთ გააკეთო, უფრო ღრმად იგრძნო და მეტი ემოცია შექმნა სტუმრისთვის.
თუმცა განსაკუთრებით ვამაყობ იმ პროექტებით, რაც უკვე განხორციელდა. მაგალითად, Falestra Restaurant-ში ვუმასპინძლეთ გასტრო კვირეულს, რომლის ფარგლებშიც საქველმოქმედო საღამო მოვაწყვეთ უკრაინაში დაზარალებულთა დასახმარებლად. ასევე გვიმასპინძლია არაერთ ცნობილ არტისტს — Cerrone, Diana King, Lisa Stansfield — და ამ ღონისძიებებით ძალიან ბევრი ჩვენი სტუმარი გავაბედნიერეთ.
როდესაც ხედავ, რომ შენი სივრცე ადამიანებისთვის ემოციურ გამოცდილებად იქცა, ხვდები, რომ სწორ გზაზე ხარ. და ეს გზა არასდროს მთავრდება.
კითხვა 4: რას ურჩევდით იმ კოლეგებს, რომლებიც ახლა იწყებენ კარიერას ჰოსპიტალითი სფეროში ან ფიქრობენ ამ მიმართულებით განვითარებას?
გიორგი სამარგულიანი:
ძალიან საინტერესო კითხვაა. ჰოსპიტალითი სფერო ცოცხალი ორგანიზმივით არის — ის მუდმივად მოძრაობს, იცვლება და რეაგირებს ადამიანების ემოციებზე. ამიტომ ამ სფეროში ყველაზე მნიშვნელოვანია გულწრფელობა და ის, რომ ბოლომდე გრძნობდე იმას, რასაც აკეთებ.
მე ყოველთვის ვურჩევდი დამწყებებს, რომ მიჰყვნენ გულის კარნახს. თუ ადამიანი მხოლოდ პოზიციისთვის ან ფინანსური სარგებლისთვის მოდის ამ სფეროში, ეს დიდხანს ვერ გაამართლებს. ხოლო თუ საქმის სიყვარული და სტუმრისადმი გულწრფელი დამოკიდებულება გაქვს, შედეგიც აუცილებლად მოვა. აქ წარმატება პირდაპირ კავშირშია ემოციასთან, შრომასთან და ადამიანების პატივისცემასთან.
კითხვა 5: რომელი მენეჯერული გადაწყვეტილებით ხართ ყველაზე მეტად კმაყოფილი და რას მიიჩნევთ თქვენს მთავარ განმასხვავებელ უპირატესობად?
გიორგი სამარგულიანი:
ერთ-ერთი ყველაზე მნიშვნელოვანი და ამავდროულად სარისკო გადაწყვეტილება, რაც Axis Towers Wellness-ის შექმნის პროცესში მივიღე, იყო სეილების გუნდის დამატება და ცალკე სეილების ლაუნჯის შექმნა. ეს გადაწყვეტილება ფინანსურად ზრდიდა ხარჯებს და სახელფასო ბიუჯეტს, თუმცა მჯეროდა, რომ გრძელვადიან პერსპექტივაში შედეგს მოგვიტანდა.
იმ პერიოდში ბაზარზე არსებულ ველნესებს მსგავსი სტრუქტურა არ ჰქონდათ — დამატებითი, პროფესიონალური სეილების გუნდი. სწორედ ამ განსხვავებულმა მიდგომამ და სეილების გუნდში სწორად შერჩეულმა კადრებმა განაპირობა ის, რომ Axis Towers Wellness გახსნის დღიდანვე ბაზრის ლიდერი გახდა.
ეს გადაწყვეტილება დღეს ჩემთვის განსაკუთრებული საამაყოა, რადგან მან დაამტკიცა, რომ გააზრებული რისკი, სწორი ხედვა და გუნდზე ინვესტირება ყოველთვის ამართლებს.
