ალტე უნივერსიტეტმა იორდანიის წამყვან ჯანდაცვის დაწესებულებებთან – Biolab Medical Laboratory, Bioclinic Medical Centers და Bioscan Radiology & Medical Imaging – თანამშრომლობის მემორანდუმი გააფორმა, რომელიც მედიცინის საერთაშორისო სკოლის სტუდენტებისთვის საერთაშორისო კლინიკური პრაქტიკის განხორციელებას ითვალისწინებს.
იორდანიის ჰაშიმიტურ სამეფოში ალტე უნივერსიტეტის ოფიციალური აკადემიური აღიარების საფუძველზე გაფორმებული შეთანხმება მედიცინის პროგრამის სტუდენტებს შესაძლებლობას აძლევს, პრაქტიკული კლინიკური სწავლება გაიარონ Biolab-ის თანამედროვე სამედიცინო ცენტრებში.
ალტე უნივერსიტეტის სტუდენტები სტრუქტურირებულ კლინიკურ და პრაქტიკულ სწავლებაში ჩაერთვებიან. ისინი გამოცდილებას მიიღებენ ლაბორატორიულ გამოკვლევებში, ამბულატორიულ და გადაუდებელ სამედიცინო მომსახურებაში, ასევე თანამედროვე სამედიცინო გამოსახულების (მაგ: რენტგენისა და ტომოგრაფიის) ცენტრებში.
თანამშრომლობა აერთიანებს აკადემიურ სწავლებასა და რეალურ კლინიკურ პრაქტიკას, რაც ხელს უწყობს სტუდენტების პროფესიული მზაობისა და გლობალური ხედვის განვითარებას.
ალტე უნივერსიტეტის პრეზიდენტმა, რამაზ კუკულაძემ, შეთანხმების სტრატეგიულ მნიშვნელობაზე ისაუბრა:
„საერთაშორისო კლინიკური გამოცდილება თანამედროვე სამედიცინო განათლების განუყოფელი ნაწილია. ალტე უნივერსიტეტი თანმიმდევრულად მუშაობს იმისთვის, რომ რეგიონში სამედიცინო განათლების ერთ-ერთ წამყვან ცენტრად ჩამოყალიბდეს. აღნიშნული პარტნიორობა კი ამ მიზნისკენ გადადგმული მნიშვნელოვანი ნაბიჯია. Biolab-თან და მის პარტნიორ სამედიცინო ცენტრებთან თანამშრომლობა ჩვენს სტუდენტებს აძლევს შესაძლებლობას, მაღალტექნოლოგიურ გარემოში მყარი კლინიკური უნარები, პროფესიული თავდაჯერებულობა და ფართო, გლობალური ხედვა განივითარონ.”
Biolab Medical Laboratory და მისი პარტნიორი დაწესებულებები რეგიონის წამყვანი სამედიცინო ორგანიზაციებს წარმოადგენენ. ისინი პაციენტებს სთავაზობენ 700-ზე მეტ ლაბორატორიულ კვლევას, თანამედროვე სამედიცინო გამოსახულების სერვისებს (როგორებიცაა რენტგენი, ულტრაბგერითი კვლევა და ტომოგრაფია), ასევე – სრულფასოვან ამბულატორიულ და გადაუდებელ სამედიცინო მომსახურებას.
ალტე უნივერსიტეტი, 25-წლიანი გამოცდილებითა და 3 000-მდე სტუდენტით 50-ზე მეტი ქვეყნიდან, აგრძელებს საერთაშორისო კლინიკური პარტნიორობების გაფართოებას და კიდევ უფრო აძლიერებს საკუთარ პოზიციას, როგორც მაღალი ხარისხის, პრაქტიკაზე ორიენტირებული სამედიცინო განათლების მიმწოდებელი ცენტრი რეგიონში.
